सूचना प्रविधि मेला फागुन २१ देखि

2
सूचना प्रविधि मेला

पोखरा, फागुन ५-  कम्प्युटर एसोसिएसन अफ नेपाल (क्यान) महासङ्घ कास्कीले यही फागुन २१ देखि आगामी चैत १ गतेसम्म सातौँ पोखरा सूचना प्रविधि मेला गर्ने भएको छ ।

विगतका वर्षमा क्यान कास्कीले आफ्नो छुट्टै समयमा मेला सञ्चालन गर्दै आएकामा यस वर्ष बढी दर्शक भेला हुने पोखरा उद्योग वाणिज्य सङ्घले गर्ने व्यापार मेलामा कार्यक्रम गर्न लागेको क्यानका सचिव विश्वास भण्डारीले आज बिहान यहाँ आयोजित पत्रकार सम्मेलनमा जानकारी दिनुभयो ।

पोखरा प्रदर्शनी केन्द्रमा रहेको डोमभित्रका ७८ कक्षमा सूचना प्रविधिसँग सम्बन्धित कक्ष राखिनेछ । गएका वर्षमा अधिकांश कक्षमा डेक्सटप, ल्यापटप र अन्य कम्प्युटर मात्र राखिने गरिएकामा यस वर्ष भने नवीनतम प्रविधि प्रदर्शनी एवम् मोबाइल बिक्रीका लागि पनि कक्ष राखिने संस्थाका अध्यक्ष चिन्तामणि बाँस्तोलाले बताउनुभयो ।

मेलामा विदेशका विभिन्न कलेजमा अध्ययन एवम् रोजगार गर्न चाहने विद्यार्थीका लागि शैक्षिक परामर्श दिन सक्ने कक्ष पनि राखिएको छ । मेलामा काठमाडौँबाट पनि विभिन्न कम्प्युटर तथा मोबाइलको प्रदर्शनी तथा बिक्रीका लागि धेरै कक्ष रहने समेत बताइएको छ । मेला सम्पन्न गर्न अध्यक्ष बाँस्तोलाको संयोजकत्वमा मूल समिति र उपसमितिहरु गठन गरिएको छ ।

एक उत्तर छोड्न