अनेरास्ववियुका पदाधिकारीलाई जिम्मेवारी हस्तान्तरण

जिम्मेवारी

काठमाडौँ, फागुन ११-अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)का नवनिर्वाचित पदाधिकारीलाई आज जिम्मेवारी हस्तान्तरण गरिएको छ ।

पुरानो कमिटीका तर्फबाट अध्यक्ष किशोरविक्रम मल्लले नवनिर्वाचित अध्यक्ष नवीना लामालाई पद हस्तान्तरण गर्नुभएको हो ।

नयाँ कमिटीका तर्फबाट १४२ सदस्यीय कमिटीका हाल काठमाडौँँमा उपलब्ध भएका सबै पदाधिकारीले आज पदबहाली गर्नुभएको छ । अनेरास्ववियुको माघ २८ देखि फागुन ९ गतेसम्म भएको २२औँ राष्ट्रिय सम्मेलनबाट लामाको नेतृत्वमा नयाँ कार्यसमिति निर्वाचित भएको छ ।

नेकपा (एमाले) को विद्यार्थी फाँटका इन्चार्ज रवीन्द्र अधिकारीले अब मुलुकमा समृद्ध नेपालका लागि आवश्यक पर्ने जनशक्ति तयार गर्ने खालको शिक्षा प्रणाली अपनाउनुपर्ने बताउनुभयो ।

उहाँले कुनै पनि क्षेत्रबाट राष्ट्र निर्माणमा लाग्न सकिने शिक्षा अबको पुस्तालाई सिकाउनुपर्नेमा जोड दिँदै राजनीति, कूटनीति, प्रशासन, कृषि, उद्योगका क्षेत्रमा दक्ष जनशक्ति उत्पादन गर्नका लागि अनेरास्ववियुले अन्य विद्यार्थी सङ्गठन तथा विकास सम्बद्ध संस्थासँग समन्वय र सहकार्य गर्नुपर्ने सुझाव दिनुभयो ।

रामकुमारी झाँकी पछि नवनिर्वाचित दोस्रो महिला अध्यक्ष लामाले देशमा गुणस्तरीय र व्यावसायिक शिक्षा कायम गराउन आफूले भूमिका निर्वाह गर्ने प्रतिबद्धता व्यक्त गर्नुभयो ।

Leave a Reply