सञ्चालक पक्राउ परेको विरोधमा म्यानपावर आन्दोलित

सञ्चालक

काठमाडौँ,  फागुन १३ – सञ्चालक पक्राउ परेको विरोधमा म्यानपावरले कामदार नपठाउने  भएका छन् |प्रहरीले बुधबार १७ म्यानपावर कम्पनीमा छापा मारेर केही सञ्चालक लाई पक्राउ गरेको विरोधमा सबै म्यानपावरले आज कार्यालय बन्द गरेका छन् ।

सङ्घको आजको बैठकले आगामी फागुन २२ गतेदेखि अनिश्चितकालका लागि वैदेशिक रोजगारीमा पठाउन बन्द गर्ने निर्णय गरिएको सङ्घका महासचिव रोहन गुरुङले जानकारी दिनुभयो ।

विदेश जानका लागि प्रवेशाज्ञा आइसकेकालाई मध्यनजर गर्दै त्यस्ता कामदारलाई एक हप्ताभित्र विदेश पठाउन सङ्घले व्यवसायीलाई आग्रह गरेको छ ।

महासचिव गुरुङले वैदेशिक रोजगारको क्षेत्रमा बारम्बार आक्रमण भइरहेको बताउँदै यसको सञ्चालनको बारेमा निश्चित कार्यविधि नबनाएसम्म कार्यालय नखोल्ने बताउनुभयो ।

प्रहरीले कार्यक्षेत्र बाहिर गएर कार्यालयमा छापा मारेको व्यवसायीको आरोप छ । वैदेशिक रोजगारीसम्बन्धी कुनै उजुरी परे सो सम्बन्धमा वैदेशिक रोजगार विभागले कारबाही गर्ने तर प्रहरीले कारबाही गर्न नपाउने उनीहरुको दाबी छ ।

महानगरीय अपराध महाशाखाको टोलीले बढी पैसा असुल्ने, कामदारलाई अलपत्र पार्ने, एउटा भनेर अर्कै रोजगारीमा पठाउने, पैसा लिएर पनि रोजगारीमा नपठाउनेलगायतका उजुरीका आधारमा ती कम्पनीमा बुधबार छापा मारेको थियो ।

Leave a Reply