जनतालाई समृद्ध बनाउने अभियान सुरु भयो – अध्यक्ष दाहाल

सुराकी

काठमाडौँ, फागुन १८ – एकीकृत नेकपा(माओवादी)का अध्यक्ष पुष्पकमल दाहालले आम नेपाली जनतालाई आर्थिकरुपमा सम्पन्न र समृद्ध बनाउने अभियान सुरु भएको बताउनुभएको छ ।

माझी राष्ट्रिय मुक्ति मोर्चाले आज यहाँ आयोजना गरेको कार्यक्रमलाई सम्बोधन गर्दै उहाँले एउटा वर्ग धनी, अर्को वर्ग गरिब, एउटा जाति अधिकार सम्पन्न र अरु जाति अधिकारबिहीन भएको व्यवस्थाको अन्त्य भएको तथा सङ्घीय लोकतान्त्रिक गणतन्त्रले सबैलाई समान अधिकार दिएको बताउनुभयो ।

नयाँ संविधानमा व्यवस्था भएका सबै विषय लागू हुन नसकेको भए पनि क्रमशः लागू गर्दै जानुपर्नेमा जोड दिँदै उहाँले आफ्नो अधिकार प्राप्तिका लागि गरिने सङ्घर्ष जायज हुने र त्यसको नेतृत्वसमेत एमाओवादीले गरेको स्पष्ट पार्नुभयो ।

अन्य जाति धर्म र वर्गका समुदायका पर्वलाई सूचीकृत गरिएको भए पनि माझी समुदायको ‘लदी पर्व’लाई सूचीकृत गराउने पहल गर्ने प्रतिबद्धता व्यक्त गर्दै अध्यक्ष दाहालले सरकार र उच्चस्तरीय राजनीतिक समितिमा उक्त प्रस्ताव लैजाने विश्वास दिलाउनुभयो ।

कार्यक्रममा कृषि विकासमन्त्री हरिबोल गजुरेलले अल्पसङ्ख्यक समुदायलाई राज्यको मूलप्रवाहमा ल्याउन सरकारले विशेष कार्यक्रम ल्याउने बताउनुभयो । उहाँले अल्पसङ्ख्यक समुदायको आर्थिक समृद्धिका लागि नीति, कार्यक्रम, योजनासहित अगाडि बढ्ने र त्यसका लागि सबैको सार्थक प्रयत्नको जरुरी रहेको स्पष्ट पार्नुभयो ।

Leave a Reply