कांग्रेस नेता प्रकाश शरण महतलाई कारबाहीको माग गर्दै सानेपामा उजुरी

प्रकाशशरण महत

काठमाडौं । पार्टीको जनाधार बलियो हुँदाहुँदै व्यक्तिगत प्रतिशोध साँध्नका लागि आपूुहरुलाई हराउने खेल खेलेको भन्दै नेपाली कांगे्रसका केन्द्रीय सदस्य डा. प्रकाशशरण महतविरुद्व उजुरी दर्ता भएको छ ।

गत स्थानीय तहको निर्वाचनमा आफूहरुलाई असहयोग गरेको भन्दै नुवाकोटका विभिन्न गाउँपालिका र वडाका उम्मेदवारहरुको समूहले कारबाहीको मागसहित आइतबार पार्टी मुख्यालय सानेपामा सो उजुरी दर्ता गरेका हुन् ।

पार्टी सभापति र केन्द्रीय अनुशासन समिति संयोजकलाई सम्बोधन गर्दै सांसदसमेत रहेका महतलाई कारबाहीको माग गर्नेहरुमा लिखु गाउँपालिका वडा नं. ३ अध्यक्षका प्रत्यासी विनोद सेडाई, ककनी गाउँपालिका वडा नं. ३ अध्यक्षका प्रत्यासी सिताराम आचार्य, शिवपुरी गाउँपालिका वडा नं. ८ अध्यक्षका प्रत्यासी शिव प्रसाद रिजाल, ककनी गाउँपालिका वडा नं. ८ अध्यक्ष प्रत्यासी शंकर अधिकारी, लिखु गाउँपालिका वडा नं. ५ अध्यक्षका प्रत्यासी विश्वप्रकाश खतिवडा रहेका छन् ।

त्यसैगरी शिवपुरी गाउँपालिका वडा नं. ८ सदस्यका प्रत्यासी कृष्ण थपलिया र जयराम तामाङ लिखु–३ का सदस्यका प्रत्यासी प्रकाश कुँवर, लिखु–५ का वडा सदस्यका प्रत्यासी कल्पना आचार्य र कृष्ण बहादुर थापा मगर, ककनी–३ का वडा सदस्यका प्रत्यासी लक्ष्मी राई र गिता सुनार, लिखु–६ का वडा सदस्यका प्रत्यासी अनुजजंग थापा र ककनी–१ का वडा अध्यक्षका प्रत्यासी मोहन कृष्ण श्रेष्ठलगायतले उजुरीपत्रमा हस्ताक्षर गरेका छन् ।

गत स्थानीय तहको निर्वाचनमा आफूहरुलाई पराजित गराउन र पार्टीलाई क्षति पु¥याउने नियतले डा. महतको प्रत्यक्ष निर्देशनमा उत्तम पाठक, केशराम तामाङ, सुमन डंगोललगायतले असहयोग गरेको र विपक्षी पार्टीका उम्मेदवारलाई मतदान गर्न लगाउने जस्ता हर्कत गरेको उनीहरुको आरोप छ ।

‘पार्टीका केन्द्रीय सदस्य डा. प्रकाश शरण महतको प्रत्यक्ष निर्देशनमा असहयोग गरेको र मतदाताहरुसँग विपक्षी पार्टीका उम्मेदवारहरुलाई मत माग्न लगाउने जस्ता पार्टी द्रोही क्रियाकलाप गरे गराएको कारणबाट हामी निर्वाचन जित्नबाट बञ्चित भई पराजित हुनुपरेको छ’ उजुरीपत्रमा लेखिएको छ ‘त्यस्ता क्रियाकलाप गर्ने गराउनेमाथि उचित कारबाहीको लागि माग गर्दछौं ।’

Leave a Reply